【地下鐵碰著她～先落車後上車無人識啊？！！】
諗返起以前，每日搭地鐵都遇到同一個女仔，雖然個女仔同我唔同學校，幸好地鐵班次都好準時，所以我每日都會見到佢。
我知道，佢都係一個準時嘅女仔，7:03AM地鐵會到站，每日佢都會喺呢班地鐵上車。
我估，佢可能為咗趕返學，每日都無食早餐。
雖然地鐵車廂唔畀食嘢，但我每日都會買兩份早餐，諗住主動將份早餐遞畀佢，借個機會去結識佢，問佢：「地鐵唔畀食嘢，不如聽日我哋約個地方食吖～」
可惜，我總係提唔起勇氣，結果每日都拎住兩份早餐返學，送畀坐我隔離位個肥仔食。
眼見隔離位個肥仔愈來愈肥，我知道唔可以再咁落去，於是我決定鼓起勇氣，一定要將份早餐遞畀個女仔。
可惜，第日一朝早落大雨，大家都趕返工趕返學，地鐵比平時更加擠迫。
幸好我都喺地鐵撞到個女仔，不過因為太多人排隊，佢應該上唔到車。
但唔緊要！我已經下定決心要今日結識佢！我怕錯過咗今日，聽日可能未必再有呢份勇氣。
地鐵門打開，我正想衝落車去結識佢時，突然！外面排緊隊嘅乘客好心急咁湧入車廂，我好似一條對抗急流嘅沙甸魚一樣，被衝返入車廂。
「唔該！唔該借借，我想落車！」我不停叫，但無人理我，佢地顧住趕返工，繼續衝上車。
最後我仲被把遮絆倒，向前仆咗落地。
地鐵車門關閉，個女仔喺車廂外同我四目交投，佢流露出一副擔心嘅表情。
「初戀啊！我嘅初戀啊！」我趴喺車廂地面大嗌，希望個女仔會聽到。
但現實係殘酷嘅，地鐵關門之後好快就開車，個女仔好快就消失喺我面前…
天意弄人，自從嗰日之後，我就無再遇到個女仔，點解？！如果當時大家先讓乘客落車再上車，你話幾好？！
過咗十幾年，每次見到有乘客一開車門就急不及待衝上車，完全唔等人落車，我都會諗返起呢件傷心事！嗚嗚﹗
Search